الوثائق الازمة للزواج مغربية من أجنبي

السلام عليكم ورحمة الله تعالى وبركاته

الوثائق المهمة للمغربية المقبلة على الزواج من من أجنبي

بالنسبة للمغربية

1_ نسخه كاملة من رسم الولادة عقود ازدياد اصليين

 

2_سجل العدلي ديالك من المدينة الي تولدتي فيها

 

3_صورة البطاقة الوطنية

 

4_تحليلة بانك ما عندك حتى مرض معدي وشهادة انك ماشي حامله هادي كتمشي عند طبيب عام وكتقولي ليه بغيت ندير شهادة عدم الحمل وتحليلة بانني غير مصابة بمرض معدي ومن الاحسن انك تاخري شهادة الحمل حتى تقربي تدفعي الوريقات لانها خاص يكون فيها تاريخ قريب

 

5_وتمشي عند المقدم تعملي شهادة الخطوبه وتاخديها للمقاطعة ومعاك 4 شهود وتعمليها عند كاتب عمومي وتوثقيها في المقاطعه

 

6_صور

 

هنا الوثائق الي غادي يحتاجها خطيبك الاجنبي

 

1_عقد الازدياد مطابق للحالة المدنية

 

2_نسخة طبق الاصل لاعتناق الاسلام واذا كان مسلم لن يحتاجها

  

3_نسخة من موافقة ولي امرك اذا كنتي قاصر

 

 

4_اذا كان متزوج ضروري يجيب معاه عقد الزواج او اذا كن متزوج سابقا يجيب حكم التطليق

 

5_شهادة الكفاءة في الزواج هادي غادي يجيبها من السفارة ديالوا من هنا في المغرب غادي يحتاج باش ياخدها اذا كان عازب شهادة العزوبة من بلده الاصلي و اذا كان متزوج غادي يحتاج شهادة الموافقة على اقامة ثبوت الزوجية بمعنى موافقة الزوجة ديالوا وهاد الشهادة ملي ياخدها يوثقها في وزارة الخارجية مع العلم انه يمشي بكريييييييي حينت تيكون الزحام بزاف

 

6_شهادة الجنسية غادي ياخدها من السفارة حتى هيا ديالوا هنا في المغرب غادي يحتاج في السفارة ما يقارب 600 درهم

 

7_شهادة الاقامة اذا كان مقيم ببلد غير بلده الأصلي

 

8_شهادة عدم السوابق العدلية من بلده الأصلي او سفارة بلده في البلد المقيم فيه

 

9_ سجل العدلي غادي ياخدها من وزارة العدل بالرباط قسم الأجانب غادي يحتاج فيها تنبر 20 درهم و صورة من جواز السفر وجواز السفر الأصلي غادي ياخدها في نهارها

 

10_شهادة تثبت مهنته ودخله الشهري يعني شهادة الشغل

 

11_هو ايضا غادي يدير تحاليل بحال ديالك انتي عند نفس الطبيب يمشي عنده ويعطيه ورقه باش يمشي لمختبر تحاليل ويعملها بانه غير مصاب باي مرض معدي

 

12_صورة من بطاقة التعريف ديالوا وكذلك شهادة الاقامة اذا كان مقيم ببلد غير بلده الأصلي يعني الا في بلاده ما غاديش يحتاجها

 

13_ صورة من جواز السفر ديالو المكان الي فيه ختم انه دخل المغرب والمكان الي فيه المعلومات دياولوا

 

14_ صور فوتوغرافية حديثة

 

دابا بالتفصيل اشنو غادي ديري

 

ملي تجمعي هاد الأوراق ديري ليها كلها نسخ 4 او 5 او 6 باش ما بقات عندك النسخ مزيان وتجمعي الأوراق الأصلية في ملف وتمشي لمحكمة الأسرة وتسولي على المكتب الي كيدفوا فيه اوراق الزواج المختلط وتمشي عند الراجل تدفعي الملف غادي يعطيك واحد المطبوعين تعمريهم وتدفعي الملف وطبعا ما تنسايش تدهني السير لانه الا ما درتيش هكذا الملف غادي يبقى في هاد المكتب اكثر من اسبوع المهم هاد الراجل غادي يجمع ليك الملف ويطلعو للقاضي

 

انتي بمجرد ما كدفعي الملف في لمحكمة صافي ما باقيش كتشوفيه هما الي كيصيفطوه من مصلحة لمصلحة

 

المهم ملي غادي يدفع ليك الملف غادي يصيفطوه من محكمة الأسرة للمحكمة الابتدائية انتي خاصك كل شويه تسولي الراجل واش الملف مشى ولا مزال ملي يقولك راه مشى للمحكمة الابتدائية تمشي انتي ليها وتسولي وهنا وبكل صراحة انا دفعت فيها رشوة 600 درهم باش القاضي ديال المحكمه الابتدائية صيفط ليا الملف هداك النهار لسنترال ديال البوليس وهادي هي اصعب مرحلة

 

غادي يصيفطوا ليك الملف ديالك عند البوليس وانتي خاص تمشي تسولي عليه هما في محكمه الأسرة غادي يعطيوك واحد الرقم هاد الرقم غادي تبقاي عاقله عليه حينت هو الي كتبقاي تسولي بيه على الملف ديالك

 

المهم غادي تمشي تسولي في سنترال على الملف ديالك الا لقيتيه عنهم غادي يقولها ليك وغادي يعملوا معاك تحقيق انتي و خطيبك واسئلة هي منين كتعرفيه وشنوا هي الطريقة الي تعارفتوا بيها واش بينكم اي علاقه جنسية وانتوما خاصكم تكونوا متافقين على نفس الاجابه و من الاحسن انك تقولي ليهم انك عرفتيه عن طريق اي شخص من العائلة

 

المهم هنا عند البوليس ضروري تدوري الفلوس لانهم الا رفضوا ليك الملف ديالك مشكله هما غادي يلمحوا ليك انهم بغاو الفلوس وانتي تقولي ليهم انك مستعجله وباغيه الملف يخرج من عندهم بسرعة وهما غادي ياخدوا رقم الهاتف ديالك حاولي تدهني السير

 

المهم البوليس كيسفطوا نسخة من الملف للعمالة غادي تمشي للعماة وتسولي على المكتب الي غادي تجيبي منه ظرف زواج مختلط غادي يسولوك على الرقم ديالك غادي تقوليه ليه وغادي يعطيك ظرف ما تفتحيهش تاخديه للقائد المقاطعة غادي تعطيه ليه غادي يقولك ديه لضابط الحالة المدنية وتاخدي معاك نسخ من كل الأوراق الي جمعتي وجواز سفرك وجواز سفر ديالوا وبطاقة الوطنية ديالك غادي تمشي عند ظابط الحالة المدنية غادي يعمر ليك شي وريقات ويسولك انتي وخطيبك وغادي ياخد هاد الوريقات للقائد ثاني وغادي تدخلي عند القائد انتي وحدك وغاددي يسولك فاش خدامه وكيفاش عرفتي هاد السيد بعض الأسئله عادية وغادي تخرجي ويدخل خطيبك لوحده يسولوا المهم خاصكم تكونوا متافقين على نفس الأجوبة المهم القائد غادي يعطيكم ظرف مغلق ما غاديش تفتحوه غادي يقولك خوديه لمحكمه الابتدائية عند وكيل الملك غادي تمشي تعطيه ليهم خاص قبلها يكون الملف الثاني مشى من عند البوليس حتى هو لعند وكيل الملك حاولي تدوري مع البوليسي الي غادي ياخده للمحكمة

  

ملي غادي يمشي الملف ديالك لمحكمه الابتدائيه عند وكيل الملك هما غادي يقولوا ليك امتى ترجعي وحتى تمى خاص تدهني مرة اخرى باش يخرج ليك الملف في يومين غادي يعطيوك الموافقه ديال وكيل الملك وغادي تاخديها ثاني لمحكمة الأسرة عند نفس الراجل الي دفعتي عنده الملف في الأول وتدوري معاه حتى هو غادي يدي ليك الملف عند القاضي وغادي يقولك امتى تطيحي العقد شوفي عدول من المحمكه غادي طيحي العقد ب 800 درهم ملي غادي طيحي العقد غادي تسناي 15 يوم حتى يخرج ليك العقد وغادي تاخديه للمحكمه الابتدائية عند نائب القاضي غادي توثقيه عنده من بعد تاخديه ثاني لوزارة الخارجيه في الرباط توثقيه وصافي تمشي تخباي شي 15 يوم يلاه ترتاحي من الجرى ديال الوراق...

 

Posted in: